Aidha, amemuagiza Mkuu wa Jeshi la Polisi nchini, Inspekta Jenerali wa Polisi (IGP) Ernest Mangu kuorodhesha majina ya watumishi raia katika jeshi hilo na kuwarejesha Utumishi, akieleza kuwa baadhi yao wanachafua jeshi hilo kwa wizi na ubadhirifu na kutaka wakapangiwe kazi nyingine.
Kuhusu wizi, Magufuli amesema kuna minong’ono inayoendelea katika jeshi hilo kwamba kati ya Sh bilioni 20 hadi 60, zinatajwa kutolewa katika kipindi hicho kwa ajili ya sare za polisi, lakini mpaka sasa hakuna sare yoyote iliyonunuliwa, jambo alilodai kama ni kweli, na kwamba watu hao wanapaswa kufikishwa mbele ya sheria.
Rais alisema hayo Ikulu, Dar es Salaam jana, alipokaribishwa kuzungumza katika hafla ya kula Kiapo cha Uadilifu kwa Viongozi wa Umma kwa makamishna 58 kati ya 60 wa Jeshi la Polisi, aliowapandisha vyeo Julai 16, mwaka huu.
Makamishna hao waliapishwa na Kamishna wa Sekretarieti ya Maadili ya Viongozi wa Umma, Jaji mstaafu Salome Kaganda wakiwamo manaibu Kamishna wa Polisi (DCP) 23 na Makamishna Wasaidizi Waandamizi wa Polisi (SACP) 35 huku wawili wakiwa nje ya nchi kwa mafunzo mafupi.
Mhasibu na watumishi hewa
Akitolea mfano, Mhasibu Mkuu wa Jeshi hilo, Frank Msaki anayetuhumiwa kufanya malipo ya posho kwa watumishi hewa wasio askari wa jeshi hilo, Rais Magufuli alisema inashangaza kuona Polisi wanakamata wezi wa kuku mtaani, lakini wezi ndani ya Jeshi hilo wanashindwa kuwakamata.
Alisema, aliagiza hatua stahiki zichukuliwe kwa mhasibu huyo na watu wengine kwa kufikishwa mbele ya sheria, kwani watu kama hao ndio wanaochafua jeshi hilo.
Alitoa mwito kwa makamishna walioapishwa kushughulikia suala la watumishi hewa katika maeneo yao ya kazi ili kuzuia ubadhirifu wa fedha na mali za umma.
Raia waondolewe
Rais Magufuli akisisitiza mfano wa mhasibu huyo, alisema ikiwa katika jeshi hilo tatizo ni raia ndio wanaochafua jeshi, IGP Mangu aorodheshe majina ya watumishi raia wote ndani ya jeshi hilo na kuwapeleka Utumishi, wakapangiwe kazi nyingine.
“Kama raia ndio chanzo, wahamisheni wapelekwe Utumishi wapangiwe kazi nyingine za kiraia maana wataendelea kuwachafua,” alisema.
Alihoji ikiwa hakuna askari polisi waliosomea uhasibu, rasilimali watu na kazi nyingine wanaoweza kuzifanya kazi hizo mpaka raia wazifanye na kusisitiza kuwa matatizo mengine katika jeshi hilo, wanayataka wenyewe kwa kuchanganya kware na njiwa pamoja.
“IGP kachambue vizuri raia wanaochafua jeshi wapelekwe Utumishi wakapangiwe kazi za uraia. Naona raia wa jeshini hashughulikiwi ila wa nje anashughulikiwa,” alisema Magufuli akisisitiza utekelezaji wa majukumu bila upendeleo na kwa kuzingatia sheria. Wizi wa mabilioni Magufuli alisema, “Kuna minong’ono kuwa ‘billions of money’ (mabilioni ya fedha) yamelipwa kwa ajili ya uniform (sare) za Polisi mwishoni mwa 2015, na waziri anajua, IGP (Mkuu wa Polisi) anajua, Katibu Mkuu anajua na makamishna.
Kuna wanaosema zilitoka shilingi bilioni 40, wengine 60 na wengine 20 ndani ya wiki moja. “Natumaini siku hawa watafikishwa mbele ya sheria. Magari ya polisi yamekwama bandarini kwa kukosa fedha na mabilioni yameliwa, msema kweli ni mpenzi wa Mungu, kama ni kweli, mkasimamie hili, fedha zirudi, mkakomboe magari,” alisisitiza Magufuli huku akimuuliza Waziri wa Mambo ya Ndani, Mwigulu Nchemba kuwa ni magari mangapi yamekwama bandarini na kueleza kuwa ni 77.
Agizo la Rais amelitoa huku Jeshi la Polisi, likikabiliwa na kashfa ya mkataba wenye utata wa zaidi ya Sh bilioni 30 wa Kampuni ya Lugumi Enterprises Ltd inayomilikiwa na mfanyabiashara Said Lugumi na Polisi wa mwaka 2011.
Mkataba huo unadaiwa kuitaka kampuni hiyo kufunga mitambo ya kuchukua alama za vidole katika vituo 108 vya polisi nchini; na mpaka sasa inadaiwa vituo 14 pekee vimefungwa mitambo hiyo.
Juzi IGP Mangu alisema suala hilo linashughulikiwa na Bunge. Vituo vya Polisi kutovamiwa Pamoja na agizo hilo, Rais Magufuli pia alilipongeza Jeshi la Polisi kwa kusimamia uwajibikaji, ulinzi na usalama, hali iliyorejesha amani na kupunguza uvamizi katika vituo vya polisi na uhalifu mwingine.
Alisema ana imani na Polisi na ameona kwa kipindi kifupi Jeshi hilo, limemuelewa kuhusu kuhakikisha vituo vya polisi havivamiwi na askari hawaporwi silaha. “Kipindi cha sasa naona mmeanza kunielewa.
Sijaona kituo kimevamiwa wala wale jamaa kunyang’anya silaha badala yake naona wao wananyang’anywa silaha zao. Endelezeni hiyo, safi.
Ndio maana sikuwa na wasiwasi kuwapandisha vyeo. Hata hivyo, alisema wapo wachache wanaoharibu sifa hiyo nzuri ama kwa makusudi na nia yao mbaya na aliagiza wakaambiwe wajirekebishe ama waondolewe kabisa ili mambo wanayofanya yenye ukakasi yasiendelee kuchafua jeshi hilo.
Viongozi wenye magari
Katika kusisitiza uadilifu na uwajibikaji, Rais aliwataka makamishna walioapishwa na viongozi wengine wa Polisi, kufanya kazi bila woga na kuzingatia sheria huku akionya baadhi wanaotumia nafasi zao, kutishia askari wa chini wasiguswe pindi wanapokamatwa.
Akitoa mfano, alisema kuna mabasi (akitaja Buffalo na Happy Nation) ya watu wanaodaiwa kuwa ni wakubwa, yakiguswa yanapobainika kuwa na makosa, inakuwa shida.
Aliagiza kuwa askari wa chini akishika hata gari la rais, IGP, waziri au kiongozi yeyote, aachwe atekeleze wajibu wake.
“Sheria ni msumeno, tusiwavunje moyo askari wa chini kutekeleza majukumu yao wala tusiwavunje moyo, vyeo vyetu tuweke pembeni, tuwape mamlaka tunaowasimamia kutekeleza sheria. Kuna asilimia ndogo ya wachache ukiwagusa tu wafa, mimi napokea message (ujumbe) kweli kweli, sitapenda kuona mtu anazuiwa kutekeleza sheria,” alisema Rais.
Maduka ya bidhaa majeshini
Kuhusu kuondolewa kwa punguzo la kodi kwa maduka ya bidhaa katika kambi za majeshi, rais alifafanua kuwa uamuzi huo umefikiwa baada ya kuona kuwa wanufaika wengi si walengwa.
Alisema badala yake, serikali imeamua katika mwaka huu wa fedha, fedha zilizokuwa zikipunguzwa katika bidhaa hizo ziwekwe katika mishahara ya askari na kuongeza makazi bora kwao.
“Niwahakikishie kuwa makusanyo ya mapato yanaongezeka, tutafika tu,” alisema Magufuli. VAT kwa watalii, meli bandarini Alisema kumekuwa na maneno kuwa meli zimepungua bandarini; na kueleza kuwa ni heri kuwa na meli chache, zinazoingia nchini na kulipa kodi kuliko utitiri wa meli zinazokwepa kodi na kuisababisha serikali hasara. “Tunataka anayekuja alipe kodi. Yapungue tu, hata yaache kuja yaende wasikolipa kodi,” alisema.
Kuhusu watalii kulipa Kodi ya Ongezeko la Thamani (VAT) katika huduma za utalii, Magufuli alisema ni heri kuwa na watalii 500,000 wanaolipa kodi kuliko watalii milioni mbili wasiolipa kodi.
Alisema katika kipindi hiki alichokiita cha mpito, watanzania watasikia mengi kwa kuwa wako waliozoea kupata fedha za bure, sasa hawazipati.
Hoteli tupu, safari za Dubai
Alisema watu wachache wamekuwa wakineemeka isivyo halali na kuongeza kuwa ana taarifa kuwa baadhi waliwapangia watu hoteli zaidi ya tatu na kufanya safari za kustarehe Dubai na wengi wao ni watumishi wa umma.
“Kuna waliokuwa wakipanga na kupangia watu hoteli hii, na hii na hii. Nchi hii ni yetu sote, hakuna aliyeumbwa kupata shida na mwingine astarehe. Nchi hii imeliwa, watu wanakula mabilioni ya fedha, mkafanye kazi kwani mliopandishwa vyeo mnastahili,” alisema Rais na kusifia Jeshi hilo kuwa wanafanya kazi nzuri.
Aliahidi kuyalinda, kuyazingatia na kuboresha maslahi ya Polisi na askari wa vyombo vyote vya usalama akieleza kuwa changamoto na matatizo yao yanafanana na anayafahamu.
Polisi Jamii
Rais alionesha kushangazwa na kile alichosema baadhi ya polisi, kufanya mazungumzo na wahalifu wakiwemo majambazi na kueleza kuwa dhana ya Polisi Jamii, aliipinga tangu awali akiwa Waziri wa Maendeleo ya Mifugo na Uvuvi. Alisema haiwezekani askari ameshika silaha (akitaja SMG) na jambazi anamnyang’anya huku watu wakieleza ni polisi jamii.
“Kule Chato (kijijini kwake) wananchi walivamia kituo cha polisi. Vituo vinavamiwa sisi tunasema polisi jamii, hawa watu wanapaswa kulala pema hata kama ni ndugu yangu. Naomba katika utendaji wenu mtangulizeni Mungu mbele na usalama wa raia na mali zao,” alisisitiza Rais.
Uadilifu Polisi
Akizungumzia uadilifu katika Jeshi la Polisi, Magufuli alisisitiza askari wa chini wathaminiwe na kutaka viongozi wa jeshi hilo, wajitathimini kila mmoja kwa nafasi yake katika uadilifu.
Alisema wapo baadhi ya viongozi wanaotumia nafasi zao vibaya kwa kuwakwamisha askari wa chini wanapokamata wahalifu na wao kuagiza waachiliwe.
Magufuli alisema katika kuwapandisha vyeo, wapo waliokwama baada ya majina yao kutorejeshwa kuwa wamepanda vyeo na aliwatuma makamishna waliokula kiapo, kuwaeleza waliobaki wasitafute mchawi bali wajipange na kurekebisha wasikofanya vizuri.
“Mchakato ulichukua miezi mitatu, minne, mitano hivi iliyopita, nilimwagiza IGP (Mangu) sababu nilijua kazi nzuri inayofanywa na Polisi. Nilipokea majina ya makamishna wasaidizi waandamizi 46 waliopendekezwa wakabaki 35 na manaibu 31 wamebaki 25. Msitafute mchawi, mchawi ni mimi, watumie muda kujirekebisha."
Kamishna Jaji
Kaganda Awali, akitoa maelezo ya kiapo hicho cha ahadi ya uadilifu kabla ya makamishna hao kula kiapo, Kamishna Jaji Kaganda alionya baadhi ya viongozi wa polisi kuwa sababu ya askari wa chini kushindwa kutekeleza majukumu yao kwa kuhusika kuwaachia wahalifu na kuwataka wawe sababu ya kurejesha maadili katika jeshi hilo.
“Mkumbuke ahadi hii ni nyenzo ya kutekeleza utii kwa serikali na kuweka mbele uzalendo, muitunze ahadi hii ofisini kila mnapoingia muone na wananchi waone kile mnachopaswa kutekeleza. Huu ni mkataba,” alisema Jaji Kaganda.
Alisema ahadi hiyo ni tamko rasmi na bayana la kuunga mkono mapambano dhidi ya rushwa, matumizi mabaya ya madaraka na rushwa.
Aliwataka kusimamia hayo. Jaji Kaganda aliagiza makamishna hao kuunda Kamati za Maadili katika maeneo yao ya kazi ili kero za askari na watumishi wa chini zishughulikiwe katika ngazi husika kabla ya kufika ngazi za juu.
Alisema IGP Mangu amekuwa akipokea malalamiko ya askari wa chini, ambayo yangetatuliwa na viongozi wa chini.
Mwigulu, AG
Waziri wa Mambo ya Ndani ya Nchi, Mwigulu Nchemba akitoa salamu baada ya kiapo hicho, aliwataka makamishna hao kuzingatia kasi ya serikali ya Rais Magufuli katika kuwatumikia wananchi kwa uadilifu na kuhakikisha watu hawakosi imani na jeshi hilo.
0 comments:
Post a Comment