“Bombadier ina kasi nzuri na ya kutosheleza mahitaji ya safari za ndani kwa kiwango cha kuwa na faida zaidi kibiashara, ikilinganishwa na ndege nyingine za aina yake kama ATR,” linaandika jarida hilo la Forbes.
Aidha, jarida hilo linataja faida nyingine ya ndege hizo kuwa ni uwezo wa kutumia mafuta kidogo, jambo litakalosaidia kupunguza gharama za usafiri huo wa ndege nchini kwa wasafiri wa ndani. Jarida hilo linafafanua kuwa kiwango kidogo cha mafuta, kinachotumiwa na ndege hizo, kunazifanya kuwa na ufanisi wa asilimia kati ya 48 mpaka 50 zaidi ya ndege nyingine.
Forbes linasisitiza kuwa kutokana na gharama za matengenezo kupanda na gharama nyingine za uendeshaji, ikiwemo mishahara mizuri kwa marubani, kuna uwezekano mkubwa kwa Bombardier kuendeshwa kwa bei rahisi na ikauza tiketi kwa bei rahisi zaidi kuliko ndege nyingine.
“Kwa sasa tunakadiria kuwa ndege aina ya Bombardier, ndizo zitakuwa mbadala na zitashika njia nyingi za ndani (Marekani) kwa kiasi cha asilimia 50 hadi 60 na zitasaidia kurejesha usafiri uliositishwa kutokana na gharama kubwa kwa ndege nyingine katika viwanja takribani 20,” linafafanua jarida hilo.
Akikaririwa katika makala hayo, Mike Arcamone, Rais wa Masuala ya Biashara wa Bombardier anasema wasiwasi wa awali wa abiria kuhusu ndege hizo kutumia mfumo wa turbo, sasa umeondoka kwa kuwa injini na miundo ya kisasa ya ndege hizo, inaifanya isiwe na kelele kama ilivyodhaniwa.
“Wanunuzi wengi wa ndege hizi, wamebaini kuwa hazina kelele na watumiaji wengi wanaamini kuwa zinaweza kuwa mbadala wa ndege nyingine za bei nafuu,” anasema ofisa huyo, kauli inayokubaliwa na wachambuzi wa Forbes.
Tayari Serikali ya Tanzania imeahidi kuleta ndege nyingine ya pili wiki hii, baada ya ile ya kwanza kuwasili nchini wiki iliyopita ukiwa ni mkakati na utekelezaji wa ahadi ya Rais John Magufuli ya kulifufua Shirika la Ndege Tanzania (ATCL).
Kuwasili kwa ndege hizo, pia kunaonesha Rais Magufuli anavyojitahidi, akiwa ndani ya kipindi cha mwaka mmoja wa uongozi wake.
Mbali na kuleta ndege hizo, yapo mambo mengi makubwa ambayo Rais Magufuli ameanza kuyatekeleza, aliyoahidi wakati wa kampeni za uchaguzi mkuu mwaka jana, hatua ambayo imewavutia watu wengi ndani na nje ya nchi.
Shirika letu la ndege lilikuwa na hali mbaya kutokana na kushindwa kujiendesha kutokana na gharama kubwa za uendeshaji na abiria wachache, wanaotumia usafiri wa anga.
Uchambuzi wa ndege
Wachambuzi mbalimbali nchini, wakiwemo wasomi na wafanyakazi wa zamani wa ATCL, wamechambua faida na unafuu wa Tanzania kutumia ndege hiyo kuliko ndege nyingine ambazo zina gharama kubwa.
Wanasema bei halisi ya ndege ya Boeing ambayo inaliliwa na watanzania wengi ni dola za Marekani milioni 296, wakati ndege ya Bombardier Q400 inauzwa dola za Marekani milioni 35 tu.
Wachambuzi hao wamebainisha kuwa badala ya Tanzania kununua Boeing moja, ni bora kuongeza kiasi cha dola za Marekani milioni 19 na kununua ndege aina ya Bombardier tisa.
Kuhusu kasi ya ndege hizo, wachambuzi hao wanakiri kuwa kasi ya ndege aina ya Boeing ni kubwa kuliko Bombardier kutokana na uchomaji wa mafuta, kwani kasi ya Boeing ni 590mph kwa saa wakati kasi ya Bombardier ni 414mph au 667kilometa kwa saa. Kama kutoka Dar es Salaam kwenda Mwanza ni kilometa 1,100, maana yake Bombardier itatumia saa 1.45 wakati Boeing itatumia saa 1.15, tofauti yake ikiwa ni dakika 25 tu.
Aidha, Boeing inatumia dumu moja la mafuta la lita nne kwa sekunde moja, kwa hiyo kwa saa moja ndege hiyo inatumia lita 14,400. Kwa mfano mafuta ya ndege kwa lita, yakiuzwa Sh 2,000 maana yake ili tutoe mafuta ya kuelekea safari ya Songea inayochukua takriban saa moja, zinahitajika lita milioni 28,800,000(14,400×2000) Na itahitajika abiria 96 watakaolipa Sh 300,000 ili kuweza kulipia gharama za mafuta tu, gharama hizo ni nje ya gharama za huduma na wafanyakazi na faida kwa ujumla.
Kwa upande wa Bombardier, inatumia lita 1.187 ya madumu ya mafuta kwa maili moja, yaani ukikadiria inatumia lita moja ya mafuta kwa maili moja.
Kwa mfano, Songea kwenda Dar es Salaam ni takribani kilometa 537, kwa hiyo itatumia lita 398.386875 ambazo ukizizidisha kwa gharama ya Sh 2,000 kwa lita unapata Sh 796,773. Kwa sasa kumezuka mjadala mkubwa kuhusu uhalali wa serikali, kununua ndege hizo, huku hoja kubwa zikiwa ni usalama na gharama za uendeshaji wa ndege hizo. Wiki iliyopita Serikali iliingiza nchini ndege ya kwanza kutoka Canada aina ya Bombardier, ilikotengenezwa . Ndege hiyo ya kwanza ilitua kwenye Uwanja wa Ndege wa Kimataifa wa Julius Nyerere jijini Dar es Salaam (JNIA) ikitokea nchini Canada.
Baada ya kutua ndege hiyo, ilipatiwa heshima maalumu ambayo hutolewa kwa ndege yoyote mpya inayotua katika nchi yake (Water Salute) na kisha kuegeshwa katika eneo la ndege za jeshi (Airwing Ukonga).
Akizungumza baada ya kuwasili kwa ndege hiyo, Katibu Mkuu wa Wizara ya Ujenzi, Uchukuzi na Mawasiliano, Dk Leonard Chamriho alisema ndege ya pili inatarajiwa kuwasili baada ya wiki moja.
“Baada ya kuwasili ndege ya pili ndipo yatafanyika mapokezi rasmi, yatakayoongozwa na Rais Magufuli kwa tarehe itakayotangazwa baadaye,” alisema Chamriho.
Katika taarifa ya awali iliyotolewa na ATCL mwishoni mwa wiki, ilieleza kuwa ndege hiyo yenye uwezo wa kubeba abiria 76 ikiwa na marubani wanne kutoka Canada ilianza safari ya kuja nchini tangu wiki mbili zilizopota ikipitia miji ya Reykjavík, Southampton, Malta, Luxor na Addis Ababa nchini Ethiopia. Ilieleza kuwa ndege hizo, zitaanza kufanya safari zake mara tu baada ya kukamilisha mchakato wa kusajiliwa na Mamlaka ya Usalama wa Anga Tanzania (TCAA).
“Kwa kuwa zitakuja zikiwa na usajili wa nchini Canada, tutalazimika kutumia siku mbili hadi tatu kuziingiza kwenye usajili wa TCAA pamoja na kukamilisha taratibu zingine za kisheria ili ziweze kupata ruhusa ya kufanya safari za hapa kwetu,” ilieleza.
Iliongeza kuwa safari ya kwanza ya ndege hiyo inatarajiwa kufanyika Septemba 27, mwaka huu kwenda jijini Mwanza.
“Tutakuwa na madaraja mawili yaani daraja la uchumi (Economy Class) litakalohusisha abiria 70 na daraja la biashara (Business Class) litakalohusisha abiria sita kwa kila ndege,’’ ilibainisha. Baadhi ya mikoa ambayo shirika hilo litaboresha zaidi safari zake kuwa ni Dodoma, Mwanza, Arusha, Mbeya, Kigoma, Tabora, Mpanda, Kilimanjaro, Mtwara, Zanzibar, Pemba, Bukoba na Visiwa vya Comoro. Ujio wa ndege hizo unatajwa kuwa utaleta mapinduzi makubwa kihuduma na kiutendaji kwa shirika hilo.
0 comments:
Post a Comment