Awali, Mbunge wa Moshi Mjini, Japgary Michael (Chadema), alitaka kujua ni lini Serikali itaitangaza Manispaa ya Moshi kuwa Jiji, kwani mchakato wa kupata hadhi hiyo ulianza mwaka 2012 na kupitia hatua zote za kikanuni.
Mbunge wa Moshi Vijijini, Anthony Komu, alitaka kujua mambo yanayochelewesha mji huo wa kitalii kupewa hadhi ya Jiji. Akijibu, Jafo alisema ni kweli vikao vyote vya kisheria vimekaa na kuridhia mapendekezo ya Manispaa ya Moshi, kupandishwa hadhi kuwa Halmashauri ya Jiji.
Hata hivyo, alisema baada ya maombi hayo kuwasilishwa Tamisemi kwa ajili ya maamuzi, yalirejeshwa ili yafanyiwe marekebisho kutokana na mapungufu yaliyokuwa yamebainika kulingana na vigezo na taratibu zilizopo.
Alitaja baadhi ya dosari kuwa na udogo wa Halmashauri ya Moshi, yenye ukubwa wa kilometa za maraba 58 na kushauriwa iongezwe pia Halmashauri ya Hai, ili kuifanya Moshi iwe na ukubwa wa kilometa za mraba 132. Lakini pia, alisema kulipaswa kuwa na mikakati ya mipango miji kulingana na eneo husika linalopendekezwa kuwa Jiji.
“Hivi sasa timu ya uhakiki kutoka Tamisemi ipo katika uhakiki wa maombi ya maeneo mapya ya utawala yakiwemo kutoka Manispaa ya Moshi ili kuhakiki vigezo vinavyozingatiwa katika kuanzisha maeneo hayo, baada ya kukamilika kwa kazi hii nzima, waziri mwenye dhamana na Serikali za Mitaa atashauriwa ipasavyo kuhusu maombi haya,” alisema.
Alisisitiza kuwa, vigezo vikifuatwa, hakuna shaka ya Moshi kupewa hadhi ya Jiji kwani umuhimu wake kiuchumi unafahamika, hasa kupitia sekta ya utalii.
Aidha, katika swali la nyongeza, Mbunge wa Mpwapwa, George Lubeleje (CCM) alitaka kujua kama Dodoma haikidhi kuwa na hadhi ya Jiji hasa baada ya Serikali kutangaza uamuzi wa kuhamishia rasmi shughuli zake mjini humo.
Alisema uamuzi wa kuifanya Dodoma kuwa makao makuu ya nchi ni kigezo tosha cha kuipa Manispaa yake hadhi ya Jiji, akiongeza kuwa, ubora wa miundombinu umekuwa ukiongezeka kila kukicha.
Akijibu, Naibu Waziri Jafo alisema suala la Dodoma kupewa hadhi ya Jiji, halina mashaka, kwani ni taratibu tu ndizo zinazotakiwa kufanyika ili kuipa hadhi hiyo. Naye Waziri Simbachawene aliongeza kwa kusema Dodoma ni lazima iwe na hadhi ya Jiji, kwani lina vigezo vyote vya kupata hadhi hiyo, akisema mbali ya kuwa mji mkuu wa kiserikali, Dodoma ni kubwa, ina miundombinu ya uhakika na kwamba juhudi zinafanyika kuhakikisha inafikia sifa zote za kuwa jiji na hatimaye itangazwe rasmi.
“Kwa kuwa imeamuliwa Dodoma yawe makao makuu ya Serikali, kwa kawaida na kiutaratibu lazima iwe na mamlaka ya Jiji…sasa unafanyika utaratibu wa kuamua hivyo…hata kwa ukubwa, Dodoma ina eneo kubwa zaidi na linafaa na lina sifa zote za kuwa Jiji,” alisema Simbachawene ambaye ni Mbunge wa Jimbo la Kibakwe mkoani Dodoma.
0 comments:
Post a Comment