MWENYEKITI UVCCM Mkoa wa Arusha afikishwa Mahakamani Arusha.

MWENYEKITI wa Umoja wa Vijana wa Chama Cha Mapinduzi (UVCCM) Mkoa wa Arusha, Lengai ole Sabaya (29) amefikishwa katika Mahakama ya Hakimu Mkazi Arusha kwa makosa miwili, ikiwemo kujifanya mtumishi wa umma katika Idara ya Usalama wa Taifa (TISS). Sabaya alifikishwa mahakamani hapo jana akitokea Polisi kisha kuwekwa mahabusu kwa muda na kusomewa mashtaka hayo miwili.
Akimsomea mashtaka hayo mbele ya Hakimu Mkazi wa Mahakama hiyo, Gwantwa Mwankuga, Wakili wa Serikali Lilian Mmassy alidai kuwa kosa la kwanza linalomkabili Sabaya ni la kujifanya mtumishi wa umma ambapo Mei 18, mwaka huu katika Hoteli ya Skyway iliyopo Makao Mapya jijini Arusha alijifanya kuwa mwajiriwa wa TISS.
Kosa la pili ilidaiwa kuwa katika siku isiyofahamika wala tarehe mwaka huu, alighushi nyaraka za kitambulisho cha Usalama wa Taifa chenye picha yake na kutumia namba Saturday. Code. Eagle 3 Idara ya Usalama wa Taifa chenye namba MT. 86117.
Hata hivyo, Sabaya alikana makosa hayo, na Wakili wa Serikali, Mmassy alidai upelelezi wa kesi hiyo haujakamilika na dhamana ya mshtakiwa ipo wazi. Wakili wa mshitakiwa, Yoyo Asubuhi alimwomba Hakimu Mwankuga kumpa dhamana mteja wake kwa kuwa ni haki yake ya msingi.
Hakimu Mwankuga alisema kwa kuwa dhamana ipo wazi anampa masharti Sabaya ambayo ni kuwa na wadhamini wawili wa kuaminika ikiwemo kusaini hati ya dhamana ya Sh milioni tatu kwa wadhamini wawili kila mmoja.
Wadhamini hao walikidhi masharti ya dhamana ya Sabaya na hatimaye kuachiwa kwa sharti la kufika mahakamani kila tarehe ya kesi yake na endapo atapata udhuru atoe taarifa mahakamani kupitia kwa wadhamini hao. Kesi hiyo imeahirishwa hadi Oktoba 5, mwaka huu.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.