Sababu sita za Taifa Stars kufungashiwa virago fainali za Kombe la Mataifa Afrika ziko hapa.

KOCHA wa timu ya soka ya taifa, Taifa Stars, Boniface Mkwasa ametaja sababu sita za timu hiyo kufungashiwa virago katika michuano ya kuwania tiketi ya kufuzu fainali za Kombe la Mataifa Afrika mwakani Gabon. Akizungumza na waandishi wa habari kwenye ofisi za Shirikisho la Soka Tanzania (TFF) Dar es Salaam jana, Mkwasa alisema moja ya sababu hizo ni kutofuatwa kwa programU zake kwa madai hakukuwa na fedha.
Stars ilikamilisha ratiba ya michuano hiyo kwa kipigo cha bao 1-0 na Nigeria katika mechi iliyochezwa mwishoni mwa wiki iliyopita. Nigeria pia imekosa nafasi.
Maandalizi ya kuunga unga
“Maandalizi ya kuunga unga, kuna saa nyingine unaandaa programu ukipeleka kwa mabosi TFF wanakwambia hakuna pesa, wakati mwingine unapewa sababu wachezaji wapo kwenye majukumu ya timu zao, maandalizi ni kuunga unga hakuna maandalizi ya kutosha kuleta ushindani”.
Klabu nazo tatizo/wachezaji lege lege Kocha huyo aliwaambia waandishi wa habari kuwa klabu zinatakiwa kuwaandaa wachezaji wao vizuri ili wakiitwa kwenye timu ya Taifa wawe na mchango mkubwa wa kuisaidia nchi.
“Timu ya Taifa inategemea wachezaji kutoka kwenye klabu kwa hiyo kama hawataandaliwa vizuri usitarajie kuwa na timu bora ya kiushindani,” alisema Mkwasa.
“Wachezaji wetu hawana pumzi, wapo lege lege. Ukiangalia mchezo ule (dhidi ya Nigeria) dakika ya 60 tu tumeshaishiwa nguvu hii maana yake wachezaji walikuwa lege lege hawana uwezo wa kucheza dakika 90… “Presha ilikuwa kubwa sana kipindi cha pili, wachezaji wangu walipoteza umakini kutokana na kuchoka wakaruhusu goli… “Bado tunahitaji kupata muda mzuri wa maandalizi ya timu na pia kumtumia vizuri Samatta (Mbwana anayecheza Genk,Ugiriki) kwenye mechi kama hii. Samatta ni nahodha anakuwa na jukumu kubwa la kutafuta mpira kuliko kufunga…
“Tutumie msuli wake kufunga sio kumchosha anakimbia kimbia mara pembeni mara chini, tunatakiwa tupate muda wa maandalizi ili tupate combination nzuri, vijana wetu wadogo uzoefu hawana tofauti na Nigeria wakina Obi Mikel wana uzoefu… “Maandalizi ya kuunga unga, kwa aina ya wachezaji wetu tunatakiwa kuwapa mazoezi ya nguvu ili wawe fiti, lakini muda unakuwa mfupi, mwisho wa siku tunashindwa kutoa ushindani kwenye mashindano kimataifa… “Klabu ambayo inacheza mchezo wa nguvu ambayo haimpi nafasi mtu kucheza wanashindwa, mfano mchezo kama wa Malawi, Misri ilitupa shida makocha waboreshe wachezaji wao hasa wazawa ili kuisaidia timu yetu ya taifa,” alisisitiza.
Wachezaji waende gym
“Tunafanya mazoezi kwa siku mbili tunatakiwa tupate muda, klabu zinatakiwa zihakikishe wachezaji wanakuwa fiti waende gym wakategeneze vifua wawe fiti. Ethiopia wailaza Stars benchi Mkwasa alisema TFF inapaswa kuwaandikia barua shirika la ndege la Ethiopia Airways kwa kushindwa kuwapa huduma bora wachezaji waliotangulia hadi kufikia kulala kwenye mabenchi, hali iliyosababisha uchovu kwa wanandinga hao.
Ampa tano Manula
Mkwasa aliwapa tano wachezaji wake vijana, hasa mlinda mlango Aishi Manula kwa kuonesha kiwango kizuri kwa kuokoa michomo mingi ambayo angekuwa lege lege Stars ingeambulia magoli zaidi ya sita. Alia na Caf Mkwasa alisema kitu kingine kilichosababisha Stars kushindwa kusonga mbele kwenye michuano hiyo ni kupangiwa mechi ngumu dhidi ya nchi ambazo ziko juu kwenye viwango vya FIFA.
“Angalia tumepangwa kwenye kundi lenye nchi kama Misri na Nigeria ambazo hazikufuzu michuano hiyo kwa miaka miwili sasa unategemea ingekuwaje. Halafu mechi zetu nyingi za mwisho tunamalizia ugenini. “Hata sisi tungepangiwa na Botswana, Namibia tungefurukuta tungeingia fainali, hao Uganda mnaowashangilia kundi lao lilikuwa dhaifu, TFF wakikaa kwenye vikao vyao vya CAF huku walisemee hili sisi saizi zetu Uganda, Rwanda, Kenya wangetupangia hao ndio saizi zetu. rekodi sikujua kama inawezekana”.
Aidha Mkwasa pia alisema jambo lingine lililomkera ni wachezaji wa timu hiyo kutumia jezi moja ambapo walilazimika kuivaa kwenye mazoezi na kwenye mechi. “Ifike mahali tubadilike, wachezaji jezi moja, zinaloa jasho wanakamua alafu ndio wanavaa kwa mechi, ilipaswa kuwe na jezi nyingine za kubadilisha hii imekwaza sana wachezaji hata mimi mwenyewe imeniumiza mno... “Mpira wa kisasa huwezi kuvaa jezi moja tunarudi kule kule kwa miaka ya nyuma wakati tulishatoka huko.
Atishia kuitosa Stars
Mkwasa alisema yupo njia panda kuendelea kuinoa timu hiyo kwa kile alichoeleza kuwa ni kuchoshwa na mazingira ambayo si rafiki ya ufanyaji kazi.
“Mara nyingi ukisema ukweli unaonekana mbaya, ila mimi sijali kuna vitu ambavyo vinanikwaza sana na kunipa uzito wa kuendelea na kazi yangu, hata kama watataka niendele kufundisha ni lazima tukae vikao viwili vitatu tukubaliane na nitekelezewe nitakayohitaji la sivyo sitakuwa tayari,” alisema Mkwasa.
Sababu nyingine ambayo huenda imechangia Mkwasa kutumbukia nyongo kuiona timu ya Taifa imeelezwa kuwa ni TFF kukiuka makubaliano yake katika mkataba ukiwemo kumpa nyumba, usafiri ingawa kocha huyo amekuwa akijituma na kujikuta akiishia kufanya kazi katika mazingira magumu.
Juni 21 mwaka jana, TFF ilisitisha mkataba na kocha wa kigeni kutoka Uholanzi, Mart Nooij baada ya Stars kunyukwa mabao 3-0 na Uganda Uganda (The Cranes) kwenye mechi za kuwania kufuzu fainali za kombe la mataifa Afrika kwa wachezaji wa ndani (CHAN) na kumteua Mkwasa kuchukua nafasi hiyo.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.