Mwakyembe awatwisha mzigo DPP, DCI mauaji ya watafiti mkoani Dodoma.

WAZIRI wa Katiba na Sheria, Dk Harrison Mwakyembe amemtaka Mkurugenzi wa Mashtaka (DPP), Biswalo Mganga na Mkurugenzi wa Makosa ya Jinai (DCI), Diwani Athumani, wajihusishe kikamilifu kwenye upelelezi wa kesi ya mauaji ya wataalamu wa utafiti yaliyotokea mkoani Dodoma. Dk Mwakyembe alisema hayo Dar es Salaam jana, alipokuwa akizungumza na waandishi wa habari kuhusu mauaji ya wataalamu hao, yaliyotokea katika kijiji cha Iringa Mvumi wilayani Chamwino.
Wataalamu wawili wa Kituo cha Utafiti wa Kilimo cha Selian Arusha (Sari) na dereva, waliuawa kikatili Oktoba Mosi, mwaka huu.
Alisema Jamhuri itahakikisha inadai adhabu kali kwa kila mtuhumiwa ili kutoa fundisho kwa wananchi wote, kwa kuwa tabia ya kujichukulia sheria mkononi hailipi.
Watafiti waliouawa ni Teddy Lumanga, Jaffari Mafuru na dereva wao Nicas Magazine.
“Pia wizara inaviomba vyombo vyote vya habari kuisaidia serikali katika kampeni hii dhidi ya utaratibu huu batili wa kujichukulia sheria mkononi hasa ikizingatiwa kuwa waandishi wa habari wenyewe wamo kwenye kundi la wanataaluma mbalimbali wanaokwenda kila sehemu nchini wakilindwa na utawala wa sheria.
Alisisitiza kuwa ili kukomesha wimbi hili la wananchi kujichukulia sheria mkononi, wizara yake itachukua kila hatua inayowezekana kuhakikisha kuwa wote waliohusika kushawishi, kuhamasisha au kuchochea, kupanga, kushambulia kwa mapanga na kushiriki kuchoma moto katika tukio hilo, wanafikishwa mahakamani kuvuna walichopanda.
Awali alisema wizara yake imesikitishwa na kushtushwa na ongezeko la matukio ya wananchi kujichukulia sheria mikononi, kwa visingizio mbalimbali kwa kuwa huo ni ukiukwaji wa utawala wa sheria ambao msingi serikali ina wajibu wa kuulinda.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.