Serikali kuwabana wadaiwa Sugu wa Maji Mkoani Dodoma.

WAZIRI Mkuu, Kassim Majaliwa ameagiza apatiwe orodha ya wadaiwa sugu wa taasisi zote za serikali mkoani Dodoma ambao wamelimbikiza deni la Sh bilioni 1.4 zikiwa ni ankara zao za maji. Waziri Mkuu alitoa agizo hilo wakati akizungumza na watumishi na viongozi wa Mamlaka ya Maji Safi na Maji Taka Dodoma (Duwasa), baada ya kukagua utendaji kazi wa chanzo cha maji cha Mzakwe nje kidogo ya mji wa Dodoma.
“Niletee haraka orodha ya wadaiwa wote wa Ofisi za serikali na taasisi za umma ambao hawajalipa ankara zao. Madeni yote ni lazima yalipwe,” alisema.
Waziri Mkuu ambaye yuko katika ziara ya siku mbili ya kukagua maandalizi ya serikali kuhamia Dodoma, anatembelea sehemu mbalimbali za kutolea huduma za jamii pamoja na kukagua miundombinu ya mkoa huo.
Aliutaka uongozi wa Duwasa na watumishi wote wahakikishe wanaboresha huduma za upatikanaji wa maji hasa kwenye maeneo yanayopimwa viwanja ili wananchi au wawekezaji wanaponunua viwanja wakute huduma hiyo ipo na waanze ujenzi mara moja.
“Tumealika wawekezaji, nataka wajenge viwanda na mahoteli hapa Dodoma, sasa wakikuta maji na umeme kwenye maeneo yao, itakuwa ni kichocheo cha kuharakisha kazi za ujenzi,” alisema na kumwagiza Mkuu wa Wilaya ya Dodoma, Christina Mndeme ahakikishe eneo lililo jirani na chanzo hicho cha maji halikaliwi na mtu yeyote na linalindwa dhidi ya uchomaji moto.
“Uchomaji moto uoto wa asili umeharibu vyanzo vingi vya maji. Ni tatizo kubwa hapa nchini na halina budi kusimamiwa hadi liishe,” alisisitiza.
Alifikia uamuzi huo baada ya kupokea taarifa kutoka kwa Mkurugenzi Mtendaji wa Duwasa, David Pallangyo kwamba kuna wananchi wameanza kujenga na kufanya shughuli za kijamii jirani na chanzo hicho licha ya kuwa walikwishaondolewa zamani.
Kuhusu wadaiwa sugu, Pallangyo alisema mashirika ya umma na taasisi za serikali ndiyo wanaongoza kwa kulimbikiza madeni.
“Wananchi wa kawaida wapo wanaodaiwa lakini deni lao siyo kubwa na hao tunawamudu,” alisema wakati akizungumza na mwandishi wa habari hii. Alisema tatizo lingine linalowakabili ni uchomaji moto ambapo hivi karibuni uliwashwa moto na kuunguza baadhi ya nguzo za umeme ambazo zinapeleka umeme kwenye chanzo hicho. Alisema askari wa JKT Makutupora walisaidia kuzima moto huo ili usifike kwenye mitambo mingine ya chanzo hicho cha maji.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.