Katika mchakato huo wa upigaji kura tulisikia malalamiko mengi. Kwa mfano, wilayani Tarime mkoani Mara upigaji kura ulisimama baada ya kura za ndiyo kukamatwa na sehemu nyingine tuhuma za rushwa zilikuwa nyingi.
Hali hiyo imeufanya mchakato huo kugubikwa na utata mwingi kwani ilionekana dhahiri kwamba siku hizi utajiri unaweza kununua siasa au siasa ikanunua utajiri. Kwa mazingira hayo mfumo wetu wa kupata viongozi una tatizo kubwa.
Ni tatizo kwa sababu kama mchakato ndani ya chama kimoja unakuwa umezungukwa na mazingira yasiyoruhusu dhana ya utawala bora kufanya kazi maana yake ni kwamba wasio na fedha marafuku kupata uongozi.
Hii maana yake taifa linakosa viongozi wazuri na wenye uchungu wa kutumikia nchi kwa vile mkono mtupu haulambwi. Si hivyo tu, bali tunaitemea mate dhana nzima ya demokrasia ambayo haiamini katika kupata viongozi kwa fedha.
Kwa maana kuwa kiongozi bora ni yule anayetokana na ridhaa ya watu na si kama inavyoonekana katika mchakato huo kwani umeacha majeraha kwa wengi.
Ni kwa sababu hiyo tunajiuliza kama rushwa ilipewa kiti cha mbele ili kupofusha wapiga kura, itakuwaje uchaguzi mkuu ujao? Je, wasaka nafasi za uongozi watabeba fedha za kununua uongozi kwa magari au viroba?
Tunasema hivi kwa sababu ile dhana ya kukataa viongozi wanaonunua uongozi inafumbiwa macho kwa sababu ya taratibu tunazoambiwa zipo ndani ya chama. Hii maana yake tunageuza rushwa suala la mapatano badala ya kuwajibishana.
Kwa mfumo huo chaguzi zetu zitaendelea kuzua maswali yasiyokwisha kwa sababu tu ya kufunika kombe ili mwana haramu apite. Lakini pia, rushwa inapozidi hasa kwenye kutafuta uongozi hufikia hatua ya kusababisha vurugu.
Ni matarajio yetu katika uchaguzi mkuu ujao rabsha na rafu zilizojitokeza na kuudhalilisha mchakato huo hautajirudia kama kweli tunataka ufanyike kwa uhuru na haki, vinginevyo kicheko kinaweza kusababisha vilio.
0 comments:
Post a Comment