Maarifa yanayotelewa kwa mtu mmoja au kikundi cha watu humsaidia mwanafunzi kufika mahala, ambapo hajawahi kufika kimaendeleo.
Aidha, elimu huweza kuleta mabadiliko katika nyanja mbalimbali za maisha hususan kiuchumi, kijamii na kisiasa.
Kwa mujibu wa matunda ya elimu watu husema elimu ni sauti ya wasio kuwa na sauti kwa sababu kupitia elimu mtu anaweza kujikomboa kutoka kwenye ujinga na maradhi.
Japokuwa elimu inaweza kumtoa mtu mahala ambapo hajafika na pia kumfanya mtu kuwa wa kwanza katika jambo lolote hata kama historia yake ilikuwa mbaya, bado mazingira mazuri yanahitajika ili kumsaidia mwanafunzi kuelewa kile anachojifunza darasani.
Pamoja na mazingira kuwa mazuri jamii inapaswa kushirikiana kwa hali na mali ili kuhakikisha watoto wanaohitimu darasa la saba wanaelewa kusoma na kuandika.
Hivi karibuni Taasisi isiyokuwa ya kiserikali inayojihusisha na masuala ya utafiti Twaweza, inasema utafiti umebaini asilimia 20 ya wanafunzi wanaohitimu darasa la 7 hawawezi kusoma hadithi za kiswahili na kiingereza za kitabu cha darasa la tatu.
Mtafiti wa taasisi hiyo, Elvis Term anasema utafiti uliofanyika kuangalia watoto wanaohitimu darasa la saba kama wana uwezo wa kusoma na kuandika uliobeba jina la “je watoto wetu wanajifunza?
Uliofanyika kwa kipindi cha mwaka mmoja 2013 hadi 2014 na kutoa ripoti tatu, ambapo hii ikiwa ni ripoti ya nne.
Wanafunzi waliopimwa katika utafiti huo walikuwa ni 100,000 wenye umri wa kuanzia miaka 7-16 uliohusisha wilaya 131 katika mikoa 25 nchini.
Utafiti huo umebaini asilimia 45 tu ya watoto waliopo darasa la tatu wana uwezo wa kusoma kitabu cha darasa la pili wakati asilimia 55 hawawezi kusoma.
Utafiti huo pia umebaini wanafunzi wawili kati ya 10 pekee ambao sawa na asilimia 19 ndio wanaoweza kusoma hadithi ya kiingereza ya kitabu cha darasa la pili.
“Wanafunzi wa darasa la tatu wanaoweza kusoma kiswahili cha darasa la pili ni kati ya wanafunzi wanne hadi watano ambao ni sawa na asilimia 80,” anasema Term.
Pia, utafiti huo umebaini watoto watatu kati ya 10 ndio wana uwezo wa kufanya hisabati rahisi za kuzindisha za kitabu cha darasa la pili ambao ni sawa na asilimia 29 tu ya watoto wanaosoma darasa la tatu.
Anasema akiwa kama mtafiti, utafiti huo unaashiria hali mbaya ya maendeleo ya elimu duni nchini hali inayomsukuma kutoa mwito kwa jamii kuzingatia umakini wa suala la elimu kwa watoto.
“Kwa kuzingatia ripoti ya utafiti huu ni dhahiri matokeoyanathibitisha maendeleo duni ya sekta ya elimu nchini japo kumekuwepo na juhudi mbalimbali za kuinua kiwango cha elimu nchini,” anasema.
Pia, anasema tofauti za kijiografia nchini zinaonekana kuwa sababu kubwa zinazoendelea kuathiri uwezo wa watoto kujifunza.
Kutokana na ripoti ya utafiti huo watoto wenye umri wa miaka 7 hadi 16 wanatofauti ya ufaulu wa takribani asilimia 20 kati ya maeneo ya vijijini na mjini.
Asilimia 67 ya watoto wa mjini wana uwezo wa kusoma hadithi ya kiswahili ya kitabu cha darasa la pili ikilinganishwa na asilimia 46 tu ya watoto wa vijijini.
Term anasema asilimia 44 ya watoto wa mjini wanaweza kusoma hadithi ya kiingereza kitabu cha darasa la pili ikilinganishwa na asilimia 26 ya watoto wa vijijini.
Anasema tofauti ya kijiografia bado inaonekana kuleta tofauti kubwa kati ya watoto wa mjini na vijijini na hali hiyo inahusisha baadhi ya wazazi waliopo maeneo ya vijijini kutofuatilia kile watoto wanachojifunza.
Aidha, anasema katika wilaya 5 ambazo zimefanya vizuri kwenye utafiti huo zote ni za mjini, ambapo asilimia ya watoto wenye miaka 9-13 ambao walifaulu majaribio ya masomo yote matatu, somo la hisabati, kiswahili na kingereza ni wilaya za mjini.
Mbali na hilo, utafiti huo pia umebaini kuwa kuna tofauti kubwa ya kusoma na kuhesabu kati ya watoto wanaotoka katika familia tajiri na masikini.
Pia, anatoa mwito kwa jamii kwamba lazima iwajibike kuhakikisha watoto wanaohitimu darasa la saba wanaweza kusoma na kuandika.
Anasema ni vyema wazazi wachukue jukumu lao la kushirikiana na walimu kufuatilia maendeleo ya mtoto ili kuwajengea watoto msingi imara wa masomo.
Kimsingi ni kwamba wazazi wanapaswa kuelewa urithi wa mtoto ni elimu na elimu bora hujengwa kwa misingi imara ambayo ni pamoja na kufuatilia maendeleo ya mtoto shuleni ili kumjengea uwezo wa uelewa.
0 comments:
Post a Comment