Mazungumzo ya kikao hicho ambacho ni cha tatu,kitaongozwa na Rais wa Zanzibar, Dk. Ali Mohammed Shein.
Wajumbe wa kikao hicho ni Marais wastaafu wa Zanzibar, Dk. Salmin
Amour, Amani Abeid Karume, mgombea urais wa Zanzibar kwa tiketi ya Chama
cha Wananchi (CUF) ambaye pia ni Makamu wa Kwanza wa Rais, Maalim Seif
Sharif Hamad na Makamu wa Pili wa Rais wa Zanzibar Balozi Seif Ali Iddi.
Mazungumzo hayo yanasubiriwa kwa hamu kubwa na wananchi baada ya
Tume ya Uchaguzi Zanzibar (Zec), kufuta matokeoi ya Uchaguzi Mkuu
visiwani humu Oktoba 28, mwaka huuu na kuibua mgogoro mkubwa wa
Kikatiba.
Naibu Katibu Mkuu wa CUF Nassor Ahmed Mazrui, alisema kuwa hadi
sasa mazungumzo hayo bado siri kubwa hata viongozi wa ndani ya chama
chake, hawafahamu kinachoendelea tangu viongozi hao wa kitaifa kuanza
kukutana.
“Hadi sasa usiri umetawala, sielewi chochote kinachoendelea kama
kurejewa kwa uchaguzi au Zec kuendelea kutangaza matokeo, lakini
ninachofahamu kuwa kesho (leo), viongozi wakuu watakutana tena kwa mara
ya nne Ikulu,” alisema Mazrui ambaye pia ni Waziri wa Biashara, Viwanda
na Masoko Serikali ya Umoja wa Kitaifa Visiwani humu.
Alisema inasikitisha mno vikao vyote vitatu vilivyofanyika pamoja
na hicho kinachotarajiwa kufanyika leo, upande mmoja unawakilishwa na
watu watano wakati upande mwingine ukiwa na uwakilishi wa Maalim Seif
peke yake.
Alisema mashariti yaliyowekwa katika muongozo wa mazungumzo, ni
magumu kwa kuwa hakuna mtu mwingine anayeruhusiwa kushiriki katika
mazungumzo ya kutafuta muafaka wa uchaguzi wa Zanzibar zaidi ya Maalim
Seif pekee.
Hali kadhalika, Waziri wa Nchi, Ofisi ya Makamu wa Pili wa Rais wa
Zanzibar, Mohamed Aboud, alithibitisha kufanyika kwa kikao hicho, lakini
alisema hafahamu kinachoendelea pamoja na bosi wake kuwa mshiriki wa
mazungumzo hayo.
“Yawezekana wewe ndugu mwandishi unafahamu zaidi, lakini na mimi
pia nimesikia kuwa viongozi wetu watakutana, bahati mbaya sifahamu
kinachoendelea,” alisema Waziri Aboud.
Maamuzi ya kufutwa kwa matokeo ya Uchaguzi Mkuu Zanzibar,
yamesababisha Baraza la Wawakilishi kukosa uwakilishi wa wananchi
kinyume na Kifungu cha 90(1) cha Katiba ya Zanzibar ya mwaka 1984.
Kwa mujibu wa kifungu hicho, Baraza la Wawakilishi linatakiwa
kuitishwa mkutano wake wa kwanza tangu kuvunjwa Agosti 13, mwaka huu
ndani ya siku 90.
Spika wa Baraza la Wawakilishi Zanzibar, Pandu Ameir Kificho,
alisema ataendelea kushika wadhifa huo pamoja na Naibu wake bila ya kuwa
na wajumbe katika chombo hicho cha kutunga sheria Zanzibar.
Mjadala mkubwa umekuwa ukiendelea katika Manispaa ya Mji wa
Zanzibar kuhusu tarehe ya kurudiwa kwa uchaguzi huku CUF wakiendelea
kupinga lakini CCM wanaunga mkono uamuzi wa Zec.
0 comments:
Post a Comment