Karibuni Wakenya wengi zaidi kuwekeza Tanzania.

JUZI na jana Rais John Magufuli amekuwa Kenya kwa ziara ya kikazi ya siku mbili kwa mwaliko wa Rais Uhuru Kenyatta. Tunampongeza Rais Magufuli kwa kufanya ziara hiyo katika taifa hilo jirani, hasa kwa kuzingatia alikuwa hajaenda huko tangu aliposhika madaraka mwezi Novemba mwaka jana. Tumevutiwa na kauli ya Rais Magufuli ya kuwakaribisha wafanyabiashara wengi zaidi wa Kenya, kuja kuwekeza nchini, kutokana na jinsi wawekezaji wa nchi hiyo wanavyojitahidi kuwekeza.
Mathalani, kwa mujibu wa Rais, Kenya ni nchi inayoongoza kwa uwekezaji Tanzania, ikilinganishwa na nchi zote zaidi ya 50 za Bara la Afrika. Takwimu za Kituo cha Uwekezaji Tanzania (TIC) zinaonesha kuwa Kenya ina jumla ya kampuni 529 zinazoendesha shughuli zake Tanzania, ambapo zimewekeza dola za Marekani bilioni 1.7 na zimeajiri watu 56,260.
Pia, biashara kati ya Tanzania na Kenya, imeongezeka kutoka shilingi za Tanzania bilioni 652.9 hadi Sh trilioni 2.044. Rais Magufuli ambaye pia ni Mwenyekiti wa Jumuiya ya Afrika Mashariki (EAC), aliwahakikishia Wakenya kuwa uhusiano na ushirikiano wetu ni mzuri na utaendelea kukua zaidi.
Kwa miaka mingi, nchi hizi zinashirikiana vizuri katika uchumi. Wakenya na Watanzania wanafanya kazi pamoja na yapo makabila yetu ambayo yanaingiliana kwa tamaduni na shughuli zao za kila siku. Hata wanyamapori wanazunguka katika nchi hizi mbili, bila kujali mipaka iliyopo.
Tunampongeza Rais Magufuli kwa kusisitiza kuwa serikali ya Tanzania, itaendelea kuimarisha zaidi uhusiano wake na Kenya, ulioasisiwa na Rais wa Kwanza wa Tanzania, Mwalimu Julius Nyerere na Rais wa Kwanza wa Kenya, Mzee Jomo Kenyatta. Kwa miaka mingi, Watanzania na Wakenya wanaguswa na kuthamini kazi kubwa, iliyofanywa na waasisi hao.
Kuhusu maendeleo ya Tanzania, Rais aliwaeleza Wakenya kwamba viongozi wa serikali yake, wanaendelea kufanya kazi kwa bidii na kuhimiza ulipaji kodi na mapambano dhidi ya ufisadi. Kwamba, amekuwa akitumia msemo wake wa ‘Hapa Kazi Tu’, unaohamasisha kila mtu kufanya kazi kwa haraka ili nchi isonge mbele.
Pia, tunampongeza Rais Uhuru Kenyatta kwa kumhakikishia Rais Magufuli kuwa Kenya itaendelea kuimarisha uhusiano na ushirikiano wake na Tanzania. Uhuru alibainisha kwamba kwa Wakenya, Watanzania ni ndugu zao, kaka na dada zao wanaoshirikiana nao siku nyingi. Kwamba wataendeleza ushirikiano na uhusiano huo mzuri, ulioasisiwa na wazee wetu hao.
Tanzania na Kenya ni nchi zinazofanana kwa mambo mengi muhimu, ikiwemo kubadilishana uongozi wa serikali kwa njia ya amani. Kwa Tanzania, Nyerere alikabidhi kijiti kwa Mzee Ali Hassan Mwinyi, ambaye naye alimwachia Benjamin Mkapa.
Mkapa alipomaliza miaka yake kumi, alimuachia Jakaya Kikwete ambaye naye alikabidhi kijiti mwaka jana kwa Rais Magufuli.
Kwa upande wa Kenya, Mzee Jomo Kenyatta alimuachia madaraka Daniel Arap Moi, ambaye alikabidhi kijiti kwa Mwai Kibaki, ambaye naye alipomaliza muda wake alimwachia Uhuru Kenyatta. Hivyo, kama alivyosema Rais Magufuli, tunawakaribisha wawekezaji wengi zaidi kutoka Kenya, waje kuwekeza. Karibuni Tanzania.

Kuhusu TAMBARARE HALISI

This is a short description in the author block about the author. You edit it by entering text in the "Biographical Info" field in the user admin panel.